Keempee, Angelika nanonood ng sine!

Pinabulaanan ni Angelika dela Cruz na nililigawan siya ni Kempee de Leon. May nakakita sa kanilang dalawa na nanood ng sine na bida si Jennifer Lopez. Samantala, madalas daw magparinig ang aktor sa dalaga sa isang show nito kung saan tila nagpaparamdam ito na mahal niya ang dalaga.

Gaano katotoo ang balita? "Hindi ako nililigawan ni Kempee, magkaibigan lang kami. Hindi ko prioridad ang pag-ibig dahil nakasentro pa rin ako sa aking career."

Nakakaawa Naman Si Wowie

Walang pelikulang ginagawa si Wowie de Guzman at matagal-tagal na panahon ding bakante siya sa paglabas sa movie. May isa naman siyang programa sa telebisyon at ito’y ang Bubble Gang. Paminsan-minsan ay tumatanggap siya ng offer na lumabas sa stage play. Ang kinikita sa sitcom at stageplay ang ginagamit nito sa pang-araw-araw na pangangailangan sa buhay.

Naniniwala si Wowie na pana-panahon lang ang pagsikat ng isang artista. Natutuwa naman siya dahil naranasan na niyang sumikat minsan.

Love, Magandang Inspirasyon

Ang kapalaran kahit di mo man hanapin ay lalapit din kapag ukol sa iyo. Ito ang natamo ni Love Añover dahil sa sipag at tiyaga. Dati siyang tindera ng isda sa Sta. Mesa, tindera ng damit sa Quiapo at nagtinda rin ng basahan at supot.

Nagtapos ito ng AB Pilipino sa PUP at limang taong naging bahagi ng The Probe Team at three months naman sa Unang Hirit. Malaking bagay ang nagagawa nito sa Unang Hirit dahil masayahin siyang tao. Sa edad na 26 ay loveless pa rin ito at career pa rin ang napagtutuunan ng pansin. Nakabili na siya ng lote at bahay para sa magulang at pinag-aaral pa rin ang mga kapatid.

Nancy, Nililigawan Ni Paolo

Pagkatapos ng pakikipagrelasyon ni Paolo Contis kay Desiree del Valle ay may bagong pag-ibig ngayon ang young actor at ito’y sa katauhan ni Nancy Castiglione. Nililigawan ngayon ni Paolo ang dating nobya ni Lucky Manzano at mukhang may pag-asa naman ito. Boto ang mga kaibigan lalo na ang pamilya ni Paolo kay Nancy dahil bukod sa maganda ay matalino pa ito.

Nanalo si Nancy bilang Best New Female TV Personality sa nakaraang Star Awards for TV samantalang nanalo naman si Paolo bilang Best Actor by a Single Performance.

Blind Item: Sikat Na Sexy Star, Malupit Sa Alalay

Kung titingnan ang panlabas na kaanyuan ng seksing aktres na ito ay iisipin mong mabait ito pero taliwas ang kanyang maamong mukha sa kanyang ugali. Ayon sa isang source ay malupit pala ito sa kanyang alalay. Madalas niyang murahin ito kapag may nakalimutang isusuot niyang damit sa syuting. Binabatukan din niya ang nagsisilbi ring katulong sa bahay.

Ilang beses nang nagbida sa pelikula ang sexy star at hanggang ngayon ay madalas pa ring gumawa ng mga sexy movies na prodyus ng independent companies.