Piolo Pascual, simpleng tao at maginoo

Pinahanga kami ng husto ni Piolo Pascual sa pagiging isang simpleng tao at gentleman. Bagamat kilala namin na ganun si Piolo, mas lalo pa kaming bilib sa pagiging totoo niyang tao. Sa kwento sa amin ng isang kaibigan nang makasama si PJ sa Cebu para sa promo ng 9 Mornings, sobrang cool niyang tao. Wala siyang kaere-ere kahit pa isa na siyang Piolo Pascual.

"First time ko siyang makasama out of town, he’s nice at walang attitude problem. Napaka-gentleman! Dinala pa niya ang mga bagahe ko kahit napakabigat. Ako pa nga ang nahihiya dahil artista siya eh!" kwento ni Thess Gubi ng Talent Center Promo.

Hindi na ako magtataka kung bakit malayo na ang nararating ni Piolo. Mula nang mag-umpisa siya sa showbiz ay wala akong nakitang kapintasan niya. As always, napaka-down-to-earth niya kahit pa sikat na siya.

Speaking of 9 Mornings promo sa Cebu, maaga pa lang pagdating nina Piolo at Dominic ay diretso sila sa local TV program at radio stations ng Cebu. Punong-puno ng fans ang studio at halos dambahin sa halik ang dalawang aktor.

Kahit wala pang pahinga, buong giliw na ine-entertain nina Dom at PJ ang mga Cebuanos sa Gaisano Mall kung saan lahat ay nagkagulo at kulang na lang ay magiba ang stage. Nagkaroon ng fun games at autograph signing. Naging host si Mosang na walang tigil sa pagpapatawa.

Showing ang 9 Mornings sa October 16. Full support sa nasabing movie ang Merell USA at Max’s Restaurant.

* * *

First time na naming nakita ang MTV na dinirek ni Marvin Agustin for the Himig Handog Love Songs. Impressive para sa isang baguhang direktor dahil napakaganda ng execution ng nasabing MTV. Animo’y veteran na ang gumawa dahil may mga shots na swak sa taste ng mga manonood. In fact, nakaka-in love ang MTV na ito ni Marvin.

Kinunan ang Himig Handog entry na entitled "Hanggang" sa Buso, Buso kung saan napili ni Marvin sina Jay Salas ng Power Boys at baguhang si Joan Mitchell. Mabusisi ang pagkakagawa ni Marvin at sinulit niya ang isang buong araw para maging maganda ang resulta ng MTV. Composer ng nasabing kanta sina Roni at Gigi Cordero at si Wency Cornejo ang interpreter.

Pihado kaming isa ang MTV na ito ni Marvin sa magiging top contender sa People’s Texters Choice Award. Mapapanood ang nasabing MTV sa October 15 sa MYX sa Dos before Mula Sa Puso. Entry number 7 ang MTV ni Marvin. Para sa mga gustong bumoto, type HIMIG-entry number-name of sender and send it to 2366 para sa Globe, Smart and Talk ‘N Text. Makikita rin ang mechanics sa Star Studio at Chalk Magazine.