Sino si Lolita de leon?

Mahirap humanap ng larawan ng bagong sexpot ng Regal Films na si Lolita de Leon. SOP na kasi sa aming mga editor at entertainment writer na kapag may bagong pelikula na ipino-promote ay binabaha kami ng mga larawan ng mga artistang lumalabas sa pelikula. Oo nga at maraming mga studio shots at maski na stills ng pelikulang Laman na nagtatampok kay De Leon pero pawang mga larawan ito ng mga co-stars niya sa movie – Albert Martinez, Yul Servo, Elizabeth Oropesa. Wala ang kay Lolita de Leon. Bakit? Anong misteryo meron siya? Pangit ba siya kaya nila siya itinatago? O baka katulad din ng Seiko Films na sa huling sandali siya ilalantad para masabik at magkaroon ng interes ang tao?

Sabi naman ng kasama ko sa trabaho na si Salve Asis ay maganda naman daw ito. Hindi lang niya alam kung bakit wala itong larawan. At kung bakit.

Anyway, 19 years old na si Lolita. Nagtataglay ng pinaka-malaking sukat ng boobs, size 40 o mahigit pa. Nalula nga raw si Albert Martinez na nakasama niya sa ilang maiinit na eksena sa Laman. Anang direktor nila sa pelikula na si Maryo J. delos Reyes, siya ang all-time holder ng pinaka-malaking boobs sa pelikula. Wala pang sumulpot na sex star na kasinlaki ng kanyang boobs.Katunayan, napakahirap humanap ng bra na magkakasya sa kanya. At ani Yul Servo, wala pa siyang nakikitang babae na may ganitong katangian sa buong buhay niya.

Bagaman at ayon sa mga nakasama niya sa Laman ay may ibubuga siya sa pag-arte, ang kanyang boobs ang unang mapapansin ng manonood bago ang kanyang acting. At ito ay ipamamalas niya ng may pagmamalaki sa movie.

Sa kabilang dako, naiyak naman daw ang Regal producer na si Mother Lily nang mapanood umarte si Yul Servo.

"In my 40 years in the business, I’ve seen great actors and great talents. In all the movies I’ve made all these years, nakita ko na ang lahat and in all these films. I treasure the rare instances where actors and their performances give me an emotional high. As in nadadala ako sa nakikita ko. Nung mapanood ko ang trabaho ni Yul Servo dito sa Laman, talagang nadala ako, naiyak ako," sabi ni Mother Lily.

Para sa isang baguhang artista na nasa kanyang ikalawang pelikula lamang, ang papuring ito ay isang malaking tulak sa kanyang movie career.

"Importante sa akin ang Laman. Para sa marami, first time nila na makikita ako. At para makakuha ako ng positibong reaksyon sa prodyuser ko mismo, magandang senyales ito," anang aktor na ang unang pelikula ay pinamagatang Batang Westside na may limang oras na viewing time at dinirek ni Lav Diaz ay hindi pa naipapalabas sa mga sinehang komersyal dito sa atin bagaman at nakalibot na ito sa maraming international filmfests.

With Albert in Laman na siguradong magbibigay ng kanyang magandang pagganap at ang presence ng isang napaka-kontrobersyal na sexpot at isang magaling na baguhang aktor, mayroon pa bang hindi magnanais na makita kung ano pa ang maipapakita ng Laman?

*****

Hindi na isang biro ang pagbabawal ng pagtitinda ng pirated CD, VCD at DVD sa bayan ng Navotas na pinamumunuan ni Mayor Toby Tiangco. Naaprubahan na nung Hulyo 29 ng Navotas municipal court ang isang ordinansa na nagbabawal ng sale, rental at production ng mga illegally copied CD, DVD, VCD at maging cassette tapes sa buong bayan ng Navotas. Ang sinumang mahuhuli na naglalabas nito ay parurusahan – multa ng mahigit sa P2,500 o pagkabilanggo ng hindi lalabis ng anim na buwan or both. Sino mang mahulihan na mayroon mga 10 kopya ng mga pirated goods shall be presumed to be engaged in the selling, renting, distribution, manufacture, production and reproduction of pirated video and audio.

Ani Mayor Tiangco, ang pagpasa ng ordinansa –Municipal Ordinance No. 2002-18 — ang kontribusyon ng Navotas sa laban ng pamahalaan sa video at audio piracy.