Gary, hindi worried na hindi siya concert king

Kung durability bilang in-demand singer-performers ang pag-uusapan, hindi siguro magpapahuli ang professional rivals na sina Martin Nievera at Gary Valenciano. Sino nga ba sa dalawa ang dapat tawaging ‘concert king’ dahil kung achievements ang pag-uusapan, hindi nagkakahulihan ang dalawa.

Although madalas ipatong sa ulo ni Martin ang ‘concert king’ tag tulad ng ex-wife niyang si Pops Fernandez na siyang ‘undisputed concert queen’, hindi nababahala si Gary at ang kanyang mga tagahanga. Ang mahalaga, very much in demand pa rin itong mister ni Angeli Pangilinan-Valenciano hindi lamang sa pagku-concert dito sa Pilipinas at sa ibang bansa kundi maging sa recording scene.

Kamakailan lamang ay nag-launch si Gary ng kanyang first album under Viva Records na pinamagatang "One2One", isang concept album kung saan niya ka-dueto ang ilan sa ating mga first-rate singing sensations tulad nina Sharon Cuneta, Zsazsa Padilla, Kuh Ledesma, Vina Morales at iba pa.

Just right after his intimate album launch na ginanap sa Cosmopolitan Café in Quezon City, dumiretso na si Gary ng NAIA to catch his flight na magdadala sa kanya sa Germany para sa Musikmesse Festival, isa itong music trade fair na dinaluhan ng mga kinatawan mula sa iba’t ibang bansa. Ang Musikmesse 2002 ay siyang pinakamalaki at most prestigious trade fair for acoustical and electronic musical instruments, accessories and sheet music, event and communications technology, audio-visual production and entertainment sa buong mundo na ginanap nung Marso 13-17. Mahigit 1,500 ang exhibitors mula sa sa 48 na bansa.

Ang pagtungo ni Gary sa naturang fair ay sponsored ng Sennheiser na siyang nagbigay kay Gary ng distinction bilang kauna-unahang mang-aawit sa buong mundo na nagkaroon ng microphone model na hango sa kanyang pangalan. Sa Germany, nagkaroon siya ng pagkakataon na dumalo sa isang press conference nung March 13 at siya’y ipinakilala sa German at European media corps at kinagabihan naman ay nag-perform si Gary kasama ang kanyang Powerplay Band sa Sennheiser night para sa kanilang regional at international dealers (March 14) at nagkaroon din siya ng mini-show sa Sennheiser Booth.

Bukod kay Gary, ang ilan pang mga international artists na nag-perform sa Musikmesse Festival ay ang German-Irish band na Reamonn, PUR at ang top European entertainers na sina Xavier Naidoo at Michael Mittmeter. Si Gary lamang ang Asian artist na naimbitahan sa taong ito.

Mula Frankfurt, tumuloy naman si Gary and his entourage sa Berlin nung March 17 para dumalo sa International Tourismus Borse 2002 (isang travel fair show) kung saan isa si Gary sa ipinadalang representative ng Philippine Department of Tourism na nagtanghal sa grand Philippine Reception para sa international travel trade at mga taga media.

From Germany, tutulak naman si Gary ng Singapore kung saan naman siya magkakaroon ng major concert on March 24 sa Indoor Stadium na pinamagatang Revive Concert.

Samantala, pumirma ng distribution deal si Gary with MCA-Universal para sa isang compilation album ng kanyang mga hit songs mula sa kanyang tatlong album sa Universal label. Ito’y pinamagatang "I Will Be Here" na naglalaman ng 12 kanta at ito’y ipamamahagi sa mga Asian countries tulad ng Taiwan, Hong Kong, Indonesia, Malaysia, Thailand at Singapore.

* * *

Si Ina Raymundo ang pinakabagong miyembro ng hit drama serial na Pangako Sa ‘Yo at nagsimula siyang mag-taping bago pa man siya mahirang na best actress ng Star Awards for Movies ng PMPC.

Back to her old-shape na naman ang pangangatawan ngayon ni Ina matapos niyang isilang ang kanyang five-month-old baby na si Erika Rae by her Ukranian boyfriend na si Brian Poturnak.

* * *

Para sa inyong komento at feedback, mangyaring ipadala ang inyong e-mail sa [email protected]