Jessa nag-aaral ng golf para sa kanyang birthday

Isang late, intimate birthday celebration ang ibinigay ng Talent Center kay Piolo Pascual sa 9501 Restaurant sa ABS-CBN na dinaluhan ng mga press. Although pwede namang magtanong kay Piolo, naiiba ito dahil may sing-along at pwedeng kumanta sinuman sa mga press.

Hindi naman tumangging sumagot si Piolo sa mga intrigang ibinabato na bumulaga sa kanya pagdating ng bansa mula sa more than a month vacation sa Italy at Los Angeles.

"Para sa akin, wala namang nabago sa pagbabalik ko," sabi ni Piolo. "Nag-report nga agad ako sa taping ng Sa Puso Ko, Iingatan Ka. Iyong issue tungkol sa amin ng dati kong manager, siguro between me and Joji (Dingcong) na lang. Kami na lang dalawa ang dapat mag-usap and one of these days, aayusin ko ito para di naman masayang ang pinagsamahan namin. This is my birthday wish, sana’y maayos na ang lahat.

"And I feel so blessed na marami pa ring naniniwala sa akin bilang isang aktor. Trabaho po ang ipinunta ko rito at hindi pakikipag-away. Sana po ay huwag na lamang palakihin ang issue. At kami ni Judy Ann Santos mas okey kami ngayon at nagpapasalamat ako sa kanya dahil nalaman ko, ipinagtanggol niya ako habang wala ako rito. Kaya lalo kong aalagaan ang loveteam naming dalawa. Kahit kami ni Mommy Carol, okey po kami at nagpapasalamat ako sa birthday card na ibinigay niya sa akin, hindi pa nga lamang kami nagkikita simula nang bumalik ako sa bansa."

Ni hindi nga nakapag-celebrate ng birthday niya si Piolo dahil nagso-shooting siya noon ng Sweetheart with Joyce Jimenez sa Zambales. Hindi rin sila makakalabas pa ni Juday dahil pareho silang busy sa shooting.

* * *

Dingdong & Jessa...In Love. Ganito ang picture ng mag-asawa nang humarap sa ilang press people para sa pre-Valentine concert nila sa February 9, sa Folk Arts Theater, 8:30 pm.

All duet ito nina Dingdong Avanzado at Jessa Zaragoza na pawang mga greatest hits nilang dalawa, latest pop songs and all time classics na binigyan ng bagong arrangement ng musical director na si Archie Castillo. Guests nila sina Marissa Sanchez, ang Noisy Neighbors and Whiplash Dancers. Ang concept and direction naman ay kay Dingdong.

To kick off the big event, sa birthday ni Jessa sa January 31, gagawin ang "Jessa Zaragoza Birthday Golf Invitation" presented by the Ayala Heights Golfers and Friends Association headed by Director Al Quinn na gagawin sa Old Balara, Quezon City at 10:00 am. Around 50 celebrity guests golfers and members of the association ang magpa-participate. Kahit nga si Jessa ay tinuturuan ngayon ni Dingdong ng golf para makasali siya.

After the Valentine concert, may time na si Dingdong na mag-promote ng bago niyang album na iri-release ng Star Records sa March, na pwedeng makasabay pa ng 1st wedding anniversary ng mag-asawa. Si Jessa naman ay sa April pa iri-release ang bagong album sa Star Records din.

In love na in love sila sa isa’t isa , hopefully, next year, magkakaroon na sila ng baby.

* * *

Second team up na nila Judy Ann Santos at Luis Alandy ang May Pag-ibig Pa Kaya? ng Starlight Films na dinirek ni Jose Carreon. Sang-ayon kay Juday, mas mapapansin na rito si Luis na una niyang nakasama sa Luv Text. Hindi raw nakita si Luis sa Luv Text dahil maikli lamang ang role na ginampanan nito.

Biniro si Juday kung bakit pumayag siyang may kissing scene sila ni Luis sa pictorial.

"Ayaw ko namang sabihing namimili ako ng ka-partner sa kissing scene," nakangiting wika ni Juday. "Saka very gentleman naman si Luis at hindi rin niya ikinakaila na may girlfriend na siya."

For the second time, magkakasabay muli ang opening ng pelikula nila ni Jolina Magdangal sa January 30.

"Hindi po naman maiiwasang mangyari iyon. Wala naman kaming magagawa ni Jolina, nasa mga producers namin iyon, nagtatrabaho lang kami. Nasa mga manonood na kung alin ang gusto nilang panoorin. Pero sana, suportahan nila pareho ang pelikula namin ni Jolina."