John Apacible, bagong kontrabida

Ang aktor na si John Apacible ay nahaharap ngayon sa isang mapaghamong papel sa pelikulang Onsehan ng Regal Films. Sa pelikulang ito, gumanap si John bi-lang kontrabida kay Carlos Morales. Siya ang kinikilalang bagong ‘‘screen villain’’ sa lokal na pinilakang tabing! ‘‘Bilang artista, gusto kong gumanap ng iba’t ibang klaseng papel," sabi ni John. Hindi na baguhan si John sa showbiz ngunit ngayon lang siya napasabak sa aksyon. ‘‘Nag-enjoy ako dito dahil napatunayan ko ang kakayahan ko bilang aktor," sabi pa niya. ‘‘Sa Onsehan, gumanap ako bilang masama, at naipamalas ko pa ang kakayahan ko sa mga stunts sa action scenes,’’ dagdag pa niya. Sa kasalukuyan, ginagawa din ni John ang Cool Dudes na isang youth-oriented comedy film. Katatapos lang niya sa Pistolero, kasama si Jeric Raval, at isang drama/action movie mula kay Direk Jose Javier Reyes para sa Seiko Films. Nag-umpisa na rin si John sa pelikulang Parehas Ang Laban kung saan ay gumanap siya bilang partner ni Ian Veneracion.

Bukod sa pelikula, sinubukan din ni John ang entablado. Gumanap siya bilang Jose Rizal sa Ginoo ng Calamba at ang Batang Tondo. Lumabas din siya sa Limbo at ang comedy na Lungga. ‘‘Naniniwala ako na nabibigyan ako ng disiplina sa teatro,’’ sabi ni John. Umaasa si John na magkakaroon pa siya ng pagkakataong gumanap ng mabibigat na role sa teatro at sa pelikula.