Free concert ni Fredrick Herrera

Isang free concert ang ihahandog ng singer na si Fredric Herrera (ang tinig sa likod ng hit song na "Ako Na Lang Ang Lalayo" gayundin ng awiting "Isang Gabi sa Piling Mo" kaugnay sa kanyang Fans Day sa darating na Linggo (Hunyo 17), alas-3 ng hapon sa Padi’s Mindave (nasa Mindanao Ave. corner Congressional Ave., QC).

Bukod sa free concert, isasabay din sa naturang Fans Day ang launching ng Fredric Herrera’s Sing-Alike Contest kung saan malalaking premyo ang nakataya bukod pa sa pagkakataong makasama si Fredric sa kanyang mga mall shows. Ang nasabing contest ay sa pakikipagtulungan ng Padi’s Mindave ni Mr. Wilson Y. Lee Flores.

Bukod kay Fredric, magpapakitang-gilas din sa naturang affair ang kanyang FH Dancers at magkakaroon din ng special participation ang kanyang mga tagahanga. Maghahandog din ng sari-saring palaro, raffle, photo session, autograph-signing at kung anu-ano pa si Fredric para sa kasiyahan ng kanyang mga tagahanga at supporters.

Dadaluhan din ito ng mga kaibigang singers ni Fredric, mga DJs ng ilang FM stations at malalapit na kaibigang movie scribes.

Si Rey Pumaloy ang magsisilbing host at aalalayan din siya ng ilang kilalang DJs.

Sa mga nais dumalo at gustong sumali sa contest, tumawag sa 4289713/ 4530080/4144930 to 34 o sa 9253117 o kaya ay sa cell #09198424036/ 09198401145.