Engkuwentro nina Jude Estrada, Mikey Arroyo!

‘Di sinasadyang nagkita sa isang restaurant bar (Entertainment Place) along Tomas Morato ang dalawang presidential sons (ex and present) na sina Jude Estrada at Mikey Macapagal Arroyo.

Nu’ng una, inakala ng lahat na magkakaroon ng gulo lalo pa’t sariwa pa rin talaga ang nangyaring Edsa 2 kung saan napatalsik nga ang tatay ni Jude sa puwesto bilang pangulo ng bansa, at kung saan ang mother dear ni Mikey ang siyang pumalit sa pagkapangulo.

Pero, nagulat pa ang lahat sa inasal ng dalawa na parang long lost friends sila. Ang nakakatuwa pa, nasa iisang table lang sila kasa-kasama ang kanilang security guards.

And take note, nag-duet pa silang dalawa kasama ang dalawang sexy stars na sina Ana Capri at Halina Perez!

Palakpakan nga ang mga tao sa pinaunlakan nilang awitin. Isang malaking sorpresa na sabi nga’y imposibleng mangyari, pero nangyari!
Malaki rin naman ang naging participation ni Ms. Cristy Fermin para magkausap ang dalawa, kahit nando’n din ang katanungan ng ilan kung totoo ba ang ipinapakita nina Mikey at Jude o plastikan lang?

"Anak-anakan ko na ang dalawang ‘yan. Wala naman talagang problema sa kanilang dalawa," nasabi pa sa amin ni Tita Cristy.

"Hindi nga siguro mawawala ‘yung tension dahil sa mga nangyari. Hindi kami makakaiwas sa mga intriga. Pero hindi siguro kami dapat maapektuhan," sabi naman pareho nina Jude at Mikey. – Robert Perez