May naiibang ugali ang magaling na aktres

Minsan ay nagkaroon ng mahalagang lakad ang tatlong magkakaibang celebrities. Nagpasundo ang magaling na aktres na isa ring writer sa mag-asawang celebrities dahil nagkataong wala siyang driver. Sinundo ng mag-asawang celebrities ang aktres sa bahay nito. Twenty minutes na ang nakalilipas nang makiusap ang actress/writer sa mag-asawa para bumalik sila sa kanyang bahay dahil may nakalimutan daw siya.

Sumunod naman sa pakiusap niya ang mag-asawa at sinabihan ang driver na bumalik uli sila sa bahay ng aktres. Nang makarating na sila sa bahay ng aktres ay bumaba ito at doon ay dali-daling umakyat ng kanyang kuwarto, nang makabalik na siya at patungong muli sa kanilang pupuntahan ay tinanong siya ng mag-asawa kung ano ang nakalimutan niya. Sabi ng aktres "Hindi kasi nag-match ang bag ko sa kulay ng aking sapatos. Gusto kong magkaterno sila kaya nagpalit ako ng sapatos."

Hindi na lang kumibo ang mag-asawang celebrities pero naiinis sila sa ginawa ng aktres. In-demand pa rin ang tatlo sa showbiz. Ang aktres ay pangsuporta lagi sa mga bida. Bukod sa pag-arte ay magaling din itong magsulat ng istoryang pampelikula. Ang mag-asawa ay parehong mahusay sa kanilang craft at award winner.