Lalaki na kayang patigilin ang blade ng electric fan gamit ang dila, nakatanggap ng Guinness Record!

Isang kakaibang talento ang muling pumukaw sa atensiyon ng mundo matapos magtala ng pambihirang world record si Kranthi Kumar Panikera mula Telangana, India.

Sa loob lamang ng isang minuto, nagawa niyang pigilan ang pag-ikot ng mga blade ng 57 electric fans gamit ang kanyang dila sa sikat na programang Lo Show Dei Record sa Italy.

Ang nakamamanghang tagumpay na ito ay naghatid ng kasikatan kay Kranthi, na kilala rin bilang “Drill Man” dahil sa kanyang mga mapangahas na stunt.

Sa isang viral na video na ibinahagi ng Guinness World Records, makikita ang mabilis at maingat niyang pagkilos habang ipinapakita ang kanyang natatanging kakayahan.

Sa dami ng reaksyon sa social media, maraming netizen ang namangha sa kakaibang talentong ito.

May ilang nagtanong kung paano siya nagsanay sa ganitong kakaibang larangan, habang ang iba ay nagbigay ng palayaw na “Iron Tongue” sa kanya.

Ang kanyang tagumpay ay umani ng milyun-milyong views at libu-libong komento mula sa mga tao sa iba’t ibang panig ng mundo.

Ang kakaibang tagumpay ni Kranthi ay hindi lamang nagdala sa kanya ng pandaigdigang pagkilala kundi nagbigay-inspirasyon din sa marami na ipagpatuloy ang kanilang mga adhikain, gaano man ka-hindi pangkaraniwan ang mga ito.

Patunay ito na ang ­talento, kapag ginamit nang tama at may tapang, ay maaaring mag-iwan nang pangmatagalang marka.