EDITORYAL - Dami pang POGO

Mariing sinabi ni President Ferdinand Marcos Jr. sa kanyang 3rd SONA noong Hulyo na ipinatitigil na niya ang Philippine offshore and gaming operators (POGOs). Dapat na raw matigil ang panggugulo ng POGO sa lipunan. Inatasan niya ang PAGCOR na ipatupad ang kanyang utos. Sinabihan din niya ang DOLE na tulungan ang mga mawawalan ng trabaho. Dapat hanggang Dis. 31, 2024 na lamang ang POGO.

Pero tatlong buwan mula nang ihayag ang pagpapatigil sa POGO, marami pa rin ang nag-ooperate at tila walang takot sa kautusan ni Marcos. Walang nakikitang pagkabahag ng buntot sa mga nagpapatakbo ng POGO at naglipana pa rin hindi lamang sa Metro Manila kundi pati sa mga probinsiya. Nagsilipat ba sa probinsiya para matakasan ang bangis ng Presidential Anti-Organized Crime Commission (PAOCC)? Ang PAOCC ang sumalakay sa POGO hubs na iniuugnay sa napatalsik na Bamban, Tarlac mayor Alice Guo. Tumakas si Guo noong Hulyo at nagtungo sa Indonesia, Malaysia at Singapore. Nahuli siya sa Indonesia noong Setyembre 4 at nakakulong ngayon sa Pasig City Jail dahil sa kasong human trafficking.

Subalit kahit may mga personalidad nang nakakulong dahil sa POGO at ipinagbabawal na ang operasyon, patuloy pa rin ang online gaming at pati ang human trafficking, prostitution, money scam at iba pa.

Noong Miyerkules (Oktubre 4), isang POGO hub ang ni-raid ng mga awtoridad sa Pasay City. Mahigit 200 tauhan ng POGO ang naaresto ng PAOCC, Bureau of Immigration at Pasay City police. Karamihan sa naaresto ay mga Chinese national na sangkot sa love scam.

Noong nakaraang buwan, sinalakay ng PAOCC ang ilegal na POGO hub sa Subic Bay Freeport Zone kung saan dalawang Chinese ang naaresto. Na-rescue naman ang 18 Chinese nationals na biktima ng human trafficking.

May sinalakay ding POGO hub sa Parkview Villages sa Clark Freeport Zone, Mabalacat, Pampanga noong nakaraang buwan. Ayon sa PAOCC, ang pagsalakay ay ginawa dahil sa sumbong ng ilang testigo na may iligal POGO operations sa lugar.

Malinaw ang direktiba ni Marcos Jr. na tigil na ang POGO. Pero tila mahihirapan pang mawalis nang tuluyan ang mga itinuturing na salot sa lipunan dahil marami pa rin ang nag-ooperate hindi lamang sa MM kundi pati sa probinsiya.

Gumagalaw ba ang PAGCOR? Ipatupad ang utos para mapalayas ang POGO. Ang PAGCOR ang may hurisdiksiyon sa POGO.