Illegal POGO, ‘di naman nawala!

SA kabila na iniutos na ang total ban sa mga POGO sa bansa, talagang nakakapuslit pa rin ang mga ito.

Mga ilegal pa na sangkot sa iba’t ibang scam ang natutukan sa mga isinasagawang raid sa mga hub hindi lang sa mga lalawigan kundi maging sa Metro Manila.

Kahapon lamang mahigit sa 400 tauhan ng POGO hub na ni-raid sa Parañaque ang pinigil ng mga awtoridad.

Iba’t ibang nasyonalidad kabilang ang mga Pinoy ang kasama sa pinigil.

Nabatid na dawit ang operasyon nito sa sex at trading scams na kadalasang bumibiktima sa mga dayuhan.

Ayon nga  kay NCRPO chief, P/Major General Jose Melencio Nartatez Jr., may isang buwan ang isinagawa nilang surveillance bago  ang aktuwal raid sa bisa ng search warrant na inisyu ng Manila Regional Trial Court Branch 24.

Naaktuhan pa nga ng mga operatiba ang mga ginagawa ng mga empleyado ang kanilang transaksyon sa kanilang mga binibiktima.

Isang special software umano ang gamit ng mga empleyado ng POGO hub at pekeng accounts para maengganyo ang mga kliyente na mag-invest sa cryptocurrency exchange platform.

Talagang malaking halaga ang sangkot sa ganitong operasyon kaya gagawin talaga ang lahat makalusot lang.

Walang takot o pangamba ang mga ito marahil dahil sa may proteksyon ng ilang opisyal sa pamahalaan o mga awtoridad.