Isa sa binigyang diin ni Pangulong Ferdinand Marcos Jr. sa isinagawa niyang ikatlong State of the Nation Address (SONA), ang pangangailangan para makuha ng law enforcers ang tiwala ng publiko.
Hindi umano nakakasapat na maibaba lamang ang crime rate at crime-solution efficacy.
Ayon sa pangulo may matinding pangangailangan nang koordinasyon sa criminal justice system at sa judiciary.
Hindi umano sapat ang crime solution rate, kailangang maitaas din marahil ang conviction rates partikular sa mga organized crimes at mga malalaking sindikato.
Dapat nga naman hanggang sa mga hearing ng kaso ay matutukan ng mga law enforcers para makasiguro na mako-convict ang mga ito.
Pati ang pagpepresenta sa mga ebidensiya.
Nangyayari kasing madalas na nagkakaroon ng arrest ay itinuturing na agad na ‘closed case.’
Hindi pa masasabing sarado na ang kaso hangga’t hindi ito nadedesisyunan ng korte.
Malaking bagay ang koordinasyon sa judiciary para sa ikapagtatagumpay sa isang nalutas nang kaso.
Iniulat ng PNP noong Abril na umabot sa 82.69% ang crime solution efficiency mula Jan. 1, 2023, haggang March 31, 2024. Tumaas ito ng 0.62% kumpara noong October 2021 hanggang December 2022.