Lalaki na may pinakamalaking koleksiyon ng dumi ng dinosaur, nakatanggap ng Guinness World Record!

ISANG lalaki sa Arizona, U.S. ang nakapagtala ng world record dahil sa koleksiyon niya ng Coprolite o fossilized na dumi ng dinosaur at iba pang ancient animals!

Kinumpirma ng records keeping organization na Guinness World Records na si George Frandsen ang nananatiling record holder ng titulong “World’s Largest Collection of Coprolite” dahil sa koleksiyon niya ng fossilized feces na aabot na sa 8,000 pieces.

Ang coprolite ay mga nanigas na dumi ng mga sinaunang hayop o tao. Ito’y mahalagang mga artifact sa paleontology at archeology, dahil sa pamamagitan ng pagsusuri ng mga ito, maaaring matukoy ang mga uri ng pagkain, karamdaman, at iba pang impormasyon tungkol sa mga sinaunang nilalang.

Noong 2015 unang natanggap ni Frandsen ang Guinness title nang makapagkolekta siya ng 1,277 pieces ng coprolite. Bata pa lamang ay hilig na ni Frandsen ang magbasa tungkol sa dinosaurs at fossils. Labingwalong taong gulang siya nang matuklasan ang tungkol sa coprolite at simula noon, naisipan niyang mangulekta nito.

Ngayong umabot na sa 8,000 ang kanyang koleksyon, nagpasya siyang mag-resign sa kanyang corporate job at magtayo na lang ng museum kung saan ididispley niya ang lahat ng kanyang nakolektang coprolite. Tinawag niya ang kanyang museum na “Poozeum”.