Ilang PUJ drivers/ operators ‘nalinlang’ daw sa consolidation
KAHAPON umarangkada na ang ginagawang pagbusisi ng Kamara patungkol sa mga isyung bumangon sa ipinatutupad na PUV modernization program ng pamahalaan.
Sa unang salang pa lang na pagdinig, mukhang may nakikita nang mga umano’y ‘batik’ sa sistema ng programa, base sa mga isiniwalat ng isang jeepney driver at operator.
Ibinunyag ni Philip Burata sa pagdinig na kahit mahirap ay sumali siya at ilan pa niyang kasamahan sa sinasabing konsolidasyon para lang hindi matigil ang kanilang ikinabubuhay.
Pero nadoble ang kanilang kalbaryo nang kasuhan na sila ng carnapping.
Binanggit pa nito na bagama’t mahirap, napilitan silang magpa-consolidate para patuloy na makabiyahe matapos ang Dec. 31 deadline.
Ang mga jeepney na ipinalista nila sa kooperatiba na siyang rekisitos para sa naturang ‘consolidation’ ay ipinundar umano niya, gayundin ng ilan pa niyang kasamahan at kung tutuusin ay hulugan pa pero dahilan sa pagpapa-consolidate dito ay nawalan sila ng kontrol at inangkin ito ng kooperatiba.
Ang masakit pa umano nang bawiin nila at ng kaniyang mga kasamahang driver/operator ang kani-kanilang mga sasakyan ay kinasuhan pa sila ng 38 counts ng carnapping.
Bagama’t dumulog sila sa LTFRB ay sinabi sa kanilang wala na silang hurisdiksiyon sa kanilang mga sasakyan dahil ang kooperatiba na ang may-ari sa sasakyang kanilang pinapasada, matapos na sumali sa konsolidasyon.
Mukhang kailangan pa talagang maipaliwanag nang husto ang kinapapalooban ng mga panuntunan sa konsolidasyon at sa modernization.
Maraming bagay pa ang hindi nababatid ng mga driver at operator na kanilang ikinalilito, kasi nga hindi pa naipaliwanag nang husto.
Hindi nila alam kung paano ba ito tumatakbo?
Palawakin pa ang pagbibigay ng impormasyon at pagpaliwanag bago ito tuluyan maipatupad.
Napakalaki rin umano ng presyo ng mga inaalok na modern vehicles/ jeepneys
baka kasi sa kagustuhan na makapagpatuloy sa pamamasada eh tuluyan namang mabaon sa malaking pagkakautang ang mga ito na mas lalong lilikha ng matinding problema sa kanilang mga pamilya.
- Latest
