Leon, nakawala habang nasa matinding trapik sa Pakistan!

Isang adult lion ang nakawala mula sa pribadong sasakyan habang nasa kalagitnaan nang matinding trapik sa Karachi, Pakistan!

Ibinabiyahe ang leon ng kanyang may-ari nang bigla itong nakatakas sa kanyang kulungan. Nasa isang main road sa Karachi ang sinasakyan nito habang nasa matinding peak traffic hours.

Agad tumawag ang may-ari ng leon sa Sindh Wildlife Department para humingi ng tulong sa paghuli sa kanyang alaga.

Dahil nasa kasagsagan ng trapik, maraming netizens ang nakakuha ng video ng leon at kumalat sa social media ang mga ito. Isa na rito ang video kung saan mapapanood na muntik na nitong sunggaban ang isang bystander.

Lalong nagpalala ng trapik ang insidente dahil sa mga nagdatingang news vehicles at mga usisero na gustong kunan ng video ang leon upang ipost sa social media websites.

Inabot ng dalawang oras ang pag­huli sa leon. Ayon sa mga pulis, nahuli ito nang makorner sa isang basement ng abandonadong building.

Napag-alaman na walang sapat na papeles ang leon kaya idinetene ang may-ari nito at posible itong makulong at pagmultahin nang malaking halaga.