Bagong silang na sanggol, itinapon ng ina mula ika-8 palapag, himalang nakaligtas!

Himalang nakaligtas ang isang bagong silang na sanggol makaraang itapon ng kanyang ina mula sa 8th floor ng isang gusali sa New York. Ang ina ng sanggol ay nakilalang si Laquasia Wright, 18.

Ayon sa report, kasamang naninirahan ni Laquasia ang kanyang ina at kapatid sa building. Umano’y lihim ang pagbubuntis ni Laquasia.

Hindi naman nabatid kung bakit nagawa niyang ihagis ang sariling sanggol. May nagsabing natuliro na si Laquasia dahil sa problema.

Nakaligtas ang sanggol makaraang bumagsak sa bunton ng basura na nasa tapat ng bintana.

Ayon sa maintenance worker, nakarinig siya nang iyak mula sa bunton ng basura at nang kanyang tingnan, nakita niya ang sanggol sa ibabaw.

Agad niyang dinala ang sanggol sa Brooklyn Hospital at nang suriin ng mga doctor wala man lang itong galos sa katawan.

Hindi naman nabatid kung anong kaso ang isasampa sa ina ng sanggol.