Huwag nang baguhin

Ngayong natapos na ang bagyo at ulan

Lumitaw sa ulap ang dakilang araw;

Mga mag-aaral na nasa tahanan

Humahangos ngayon tungo’y paaralan!

Halos isang linggong nawalan ng pasok

Mga mag-aaral sa binahang pook;

Mga paaralang di-lubhang nalubog

Mga nagsilikas ang nasa sa loob!

Kaya nga paanong mga kabataan

Matatapos agad kursong nagustuhan?

Sungit ng panahon masaganang ulan

Di kayang salagin nitong sambayanan!

May mga mungkahing ang school opening

Buwan ng Setyembre na lang daw gawin;

Pero ang Setyembre ay maulan pa rin –

Mungkahi ng awtor huwag na lang baguhin!