Sir Juan (77)

“MAHIRAP uminom kapag nag-iisa, di ba Gringo?’’ tanong ni Sir Juan (alyas Johnny) at saka umayos ng upo.

“Oo nga Sir Johnny.’’

“Bakit nga pala Gringo ang name mo? Hula ko, paborito ng mommy mo si Gringo Honasan.’’

“Tama ka Sir. Nang ipanganak ako e kasalukuyang kinukubkob ni Gringo ang Makati.’’

“December 1989?’’

“Opo Sir.’’

“Mabuti at di ka naging sundalong rebelde?’’

“Hindi Sir. Mala­yung-malayo. Estud­yante pa ako Sir.’’
“Ganun ba?’’

“Dapat matagal na akong tapos pero nalulong sa bisyo. Pero okey na ako ngayon, baka makapagmartsa na sa March, he-he-he!’’

“Aba dapat pala tayong magselebreyt dahil magmamartsa ka na.’’

“Natuwa nga ang mother ko Sir nang malamang ga-graduate na ako.’’

Maya-maya, dumating na ang beer, crispy pata at sisig na order nila.

“O inom na tayo Gringo. Masarap uminom kapag may kakuwentuhan.’’

Inabutan ni Sir Juan ng isang bote si Gringo. Inabot naman ni Gringo.

“Ikaw Sir?’’

“Sige sabay tayo.’’

Kapwa sila tumungga.

Mas naunang nagbaba ng bote si Sir Juan.

Nag-iisip si Sir Juan habang pinagmamasdan si Gringo. Kapag nalasing si Gringo, tiyak na kakanta ito tungkol sa mga kinukuhang pictures. Malalaman niya kung sino ang nagpapa-kuha ng pictures.

Nang matapos uminom si Gringo, naging malikot na ang dila.

“Actually Sir Johnny kaya ako narito sa KOLEHIYALA ay dahil may-roon akong misyon.’’

“Anong misyon, Gringo.’’

“Kinukunan ko ng pictures si Mahinhin.’’

Napangiti si Sir Juan.

(Itutuloy)