‘Pekeng BITAG, BEN TULFO ngayong Pasko’
PINAG-IINGAT ang publiko sa Luzon, Visayas at Mindanao hinggil sa mga nagpapakilalang BEN TULFO at BITAG lalo na ngayong Kapaskuhan.
Bago pa kayo maisahan ng mga dorobo’t manggagantso, nagbibigay na ulit kami ng All Points Bulletin (APB) o babala. Huwag magpapaniwala sa mga tatawag at kakatok sa inyong mga tanggapan, pam-pribado man o publiko.
Gagayahin ang boses ko. Siya raw ’yung nasa BITAG Live sa Radyo5 at AksyonTV, BITAG T3 sa TV5 at BITAG sa People’s Television. Magso-solicit o hihingi ng donasyon o ‘di naman kaya sasabihing panggastos daw sa Christmas party ng BITAG.
Isang paglilinaw, hindi namin estilo ang magtatatawag sa kung sinu-sinong talpulano, hudas, estas at barabas para humingi ng mga donasyon. Maliban na lamang doon sa mga matitino at reputableng supporter ng BITAG na naniniwala sa aming integridad at prinsipyo.
Kaya nga natatawa ako doon sa mga tonggak na gobernador, mayor, iba pang mga pulitiko at hepe ng mga ahensya ng gobyerno na nagbigay daw agad ng libu-libong pera doon sa tumawag at nagpakilala sa kanilang BEN TULFO.
May mga tinatago kasi silang mga baho kaya kung magbigay mas mabilis pa sa alas-kwarto. Tsk…tsk! Hindi na ako nagtataka kung bakit dati pa, paborito na ng maraming putok sa buho na gamitin ang pangalan ko sa kanilang mga katarantaduhan. Gasgas at paulit-ulit ko na itong APB pero ewan ko ba kung bakit marami pa rin ang nagpapakatanga sa ganitong modus.
Kaya ngayon palang, kapag may mga tumatawag sa inyo para sa donasyon daw, sasabihing ipadala nalang sa mga remittance company, pagplanuhan n’yo na agad na i-entrap.
Kapag nahuli ‘yan kung sinumang kumag na ‘yan, dadalawin ko pa siya mismo sa presinto, papatayan ng kamera nang masampolan at madala sa kaniyang kagunggungan.
Abangan ang BITAG Live araw-araw na sabay na napapanood at napapakinggan tuwing alas 10:00-11:00 ng umaga sa Radyo5 92.3 News FM at AksyonTV.
- Latest
