Ano ba ang bagyo?

Ano ba ang bagyo? Ito ay biyaya

na bigay ng Diyos sa Kanyang nilikha;

Ito’y naglilinis sa bahay ng dukha

at naglilinis din sa mans’yong magara!

Kung kaya sa bagyo di dapat matakot

ang lahat ng taong may takot sa Diyos;

Pero kung ang tao’y may pusong balakyot

biyaya ng langit ay nakatatakot!

Pagdaan ng bagyo mahina’t malakas

ang bayan at nayon di dapat umiwas;

ang marapat lamang ang pusong busilak

sa lakas ng bagyo’y dapat pasalamat!

Kaya itong bagyo kapag dumarating

ito ay biyayang sa langit nanggaling!

Dala-dala nito ay tubig at hangin --

nagbibigay buhay sa mga pananim!