Babaing turista, hinabol ng mga gutom na rabbit sa Japan!

GUSTO n’yo bang magtungo sa isla ng Okunoshima, Japan na tinatawag na “Rabbit Island”? Kung gusto n’yo nararapat kayong mag-ingat at baka habulin kayo ng mga gutom na rabbit­ doon.

Isang babaing turista ang nakaranas habulin ng daang rabbit­ na pinaniniwalaang gutom. Nakunan ng video ang babae habang hinahabol ng rabbit. May dalang supot ang babae na may lamang pagkain at iyon ang gustong makuha ng mga rabbit. Nakapasok sa isang bahay ang babae kaya hindi naabutan ng mga gutom na rabbit.

Naging popular na tourist destination ang Okunoshima. Ang island ay dating pinaglalagyan ng poison gas na ginagamit noong World War II. Ngayon ay tahanan na ito ng mga rabbit na hindi mapigilan ang pagdami.

Babala lang ng mga awtoridad, mag-ingat ang mga turista at baka mapag-tripan ng mga gutom na rabbit.

Gayunman, hindi naman mapanganib ang mga hayop na ito.