Mga kamangha-manghang sanggol na nakaligtas sa kamatayan (5)

SANGGOL, NAHULOG SA RILES NG TREN, NAKALIGTAS! — Isang babaing sanggol ang hindi inakalang isisilang ng kanyang ina sa comfort room ng isang tren habang nagbibiyahe patungong Bihar, India.

Ayon kay Rinku Debi Ray, nagbibiyahe siya sa tren kasama ang kanyang asawa at apat na taong gulang na anak patungo sa bahay ng kanyang mga magulang sa Bihar. Kabuwanan na umano niya at sa bahay ng kanyang mga magulang nais niyang isilang ang ikalawang anak.

Kahihinto lang nila sa isang station, nang bigla siyang makaramdam nang biglang pananakit ng tiyan. Akala niya ay “madudumi” at maiihi lang siya kaya masakit ang tiyan niya. Nagtungo siya sa comfort room. Subalit nang nakaupo na siya sa toilet bowl ay bigla siyang napaanak. Bigla ang pangyayari. Nang mailabas niya ang sanggol ay nahulog ito sa bowl. At kitang-kita niya nang magtuluy-tuloy ang sanggol sa riles. Nahulog ito!

Ang natarantang si Ray ay nagmamadaling lumabas sa comfort room at pinagbigay alam sa asawa ang nangyari. Agad naman hinila ng asawa ang emergency cord para babala sa drayber ng train at huwag iaabante.

Bumaba sila at hinanap sa riles ang sanggol. Nakita nila ang sanggol. Wala itong sugat o anumang galos. Himala ang nangyari sa sanggol.