Kapiling ng ama’t ina

Ako’y isinilang sa dukhang paligid

Mga magulang ko’y kapwa magbubukid;

Ang aming pagkain ay saging at mais

Ang isda at karne bihirang makamit!

Kami ay malayo sa maisdang ilog

Tatawid pa kami ng dalawang bundok;

Sa di kalayuan may baboy at manok

Pero aso’t baril doo’y nagtatanod!

Kapirasong bukid aming sinasaka

At iyo’y bigay pa ng ama ni ina;

Sa iilang puno ng saging na saba

Sa munting maisan kami ay buhay pa!

Salamat sa Diyos ang lagi kong dasal

Sa lindol at bagyo huwag kaming tamaan;

Maligaya ako sa ganitong buhay

Basta’t kapiling ko si ama’t si inang!