Bagong Taon na

Bagong taon na kaya bagong buhay

laging naririnig kapag dumaratal

ganitong panahon at ganitong araw

na ang lumang panahon ating tinalikdan

At nagbago na nga takbo ng panahon

ang datihang ngayon isa nang kahapon

ang oras ang araw matuling tumalon

ang matandang taon naging bagong sanggol

Nagbago na nga ba itong kalayaan

nang marami nating mga kabataan

sila ba’y wala na sa mga lansanga’t

di na umiinom ng drogang kalaban

Pero nagbago ba itong buhay natin

naging masagana ba ang mga bukirin

bakit ang istambay ay istambay pa rin

at lalong dumami ang walang gawain

Saka totoo bang sa mga pasyalan

di na nakikita ang kabinataan

mga dalaginding at kadalagahan

di na nagdi-date sa labas ng bahay

Kung totoo ito’y ating masasabi

na nagbago na nga buhay nang marami

at sa bagong taon ang s’yang naghari

kabutihang asal marangal na lahi