Napoles, Revilla, Estrada, Enrile kinasuhan ng pandarambong

MANILA, Philippines – Pormal nang nasampahan ng kasong pandarambong ang umano’y mastermind ng P10 bilyon pork barrel scam na si Janet Lim-Napoles at ang mga senador na sina Ramon Revilla Jr., Juan Ponce Enrile at Jinggoy Estrada.

Bandang 3:45 ng hapon naisampa ng National Bureau of Investigation (NBI) ang reklamo sa Office of the Ombudsman sa Quezon City, kung saan sakay ng dalawang closed van at guwardiyado ng PNP Highway Patrol Group ang mga ebidensya.

Pinangunahan ni Justice Secretary Leila de Lima ang paghahain ng reklamo. Kasama rin ni De Lima ang mga imbestigador, mga abogado, at ang 10 whistleblowers, kabilang si Benhur Luy, na pawang nagbigay ng mga sinumpaang salaysay.

Kaugnay na balita: 'Pork' whistleblowers nagmisa bago magsampa ng kaso sa Ombudsman

Lumabas sa imbestigasyon ng NBI na hindi bababa sa P50 milyon ang kinita ng mga senador sa pagpasok ng kanilang mga Project Development Assistance Fund (PDAF) sa mga pekeng nongovernment organization ni Napoles.

Sinabi ni De Lima na “first batch” pa lamang sina Napoles at iba pa sa mga kakasuhan ng ahensya. Laman ng charge sheet ang 38 pangalan ng iba pang kakasuhan ng NBI.

Sa pagharap ni Luy nitong nakaraang linggo sa parallel investigation ng Senate Blue Ribbon Committee sa pork barrel scam ay isiniwalat ni Luy ang kanyang mga nalalaman sa pangungurakot ng ilang senador at ni Napoles.

Sinabi ni Luy na 50 porsiyento sa ipinapasok na pera sa mga pekeng NGO ang naibubulsa ng mga Senador, habang 40 porsiyento sa pinsan niyang si Napoles, at 10 porsiyento sa mga dinaraanang implementing agencies.

Kaugnay na balita: 50% kinikita ng mga Senador sa pork scam - Luy

“Wala pong mastermind. Siya po ang mastermind dahil siya ang boss ko,” patukoy ni Luy kay Lim.