Dyip bumulusok sa bangin: Mag-utol dedbol

MANILA, Philippines — Dalawang magkapatid na minero ang nasawi matapos mahulog ang sinasakyan nilang jeep sa bangin sa Barangay Bulbulala, Licuan-Baay, Abra noong hapon ng Marso 11.

Kinilala ang magkapatid na sina Jun at Mac, kapwa minero habang 14 ang nasugatan.

Ayon kay Police Capt. Christopher B. Abbacan, nawalan ng preno ang jeep na may 18 sakay, kasama ang drayber, habang bumababa sa palikong kalsada at nahulog sa bangin, kung saan ito bumaligtad.

Papasok sana sa trabaho ang mga biktima nang mangyari ang insidente. Kasalukuyang nagpapagaling sa ospital ang mga nasugatan.

Nagpaalala ang mga otoridad sa mga drayber na laging suriin nang maayos ang kanilang mga sasakyan bago bumiyahe para sa kaligtasan ng lahat.