Vintage bomb sumabog: Konsehal todas!

MANILA, Philippines — Halos nagutay ang katawan ng isang 42-anyos na barangay councilor habang sugatan naman ang helper nito makaraang aksidenteng sumabog ang kanilang nahukay na vintage bomb nang kanilang kalikutin sa Brgy. Almaguer South, Bambang, Nueva Vizcaya nitong Sabado.

Sa report ng Nueva Vizcaya Polie, dead-on-the spot ang biktima na si alyas Johnny, kagawad ng Brgy. Baan, Aritao, Nueva Vizcaya.

Base sa imbestigasyon, sinabi ni P/Captain Julius Abon, deputy chief ng Bambang Municipal Police Station (MPS), ang vintage bomb ay nahukay ni Johnny at ng kaniyang helper sa site ng kanilang proyekto sa Brgy. San Antonio North, Bambang.

Ang vintage bomb ay dinala ng mga biktima sa isang bahay sa lugar upang i-dismantle umano. Gayunman, habang pilit na kinakalikot ng kagawad ang lumang eksplosibo ay bigla na lamang itong sumabog.