Teroristang Dawlah todas sa Army
COTABATO CITY, Philippines — Napatay ng mga sundalo ng Philippine Army ang isang miyembro ng Dawlah Islamiya-Maute Group sa isang engkuwentro sa Barangay Kalangan, Piagapo, Lanao del Sur nitong Sabado.
Sa pahayag nitong Lunes ni Lt. Gen. Antonio Nafarrete, commander ng Western Mindanao Command, nagpapatrolya ang mga tropa ng 44th Infantry Battalion sa Barangay Kalangan nang paputukan ng mga terorista bunsod ng engkuwentro na nagresulta sa pagkamatay ng isa sa mga Dawlah terrorists at pagkasugat ng isang sundalo.
Nabatid na pinadala sa Barangay Kalangan ang mga tropa ng 44th IB matapos mag-ulat ang mga municipal officials sa Piagapo hinggil sa presensya ng mga Dawlah Islamiya-Maute Group terrorists sa naturang lugar na sapilitang nanghihingi ng pera at pagkain sa mga walang kalaban-laban na mga residente.
Natagpuan ng mga sundalo sa tabi ng bangkay ng teroristang kinilala lang na mga taga-Barangay Kalangan sa pangalang “Usman” ang isang M16 rifle, isang M14 rifle, mga bala at iba’t ibang sangkap sa paggawa ng improvised explosive device.
- Latest
