Bagong hepe ng 6th ID ng Army, itinalaga

COTABATO CITY, Philippines — Ipinasa ng bagong talagang commander ng Western Mindanao Command (Westmincom) ang liderato ng 6th Infantry Division (ID) sa kanyang kapalit sa isang seremonyang ginanap sa Camp Siongco sa Datu Odin Sinsuat, Maguindanao del Norte nitong Sabado.

Ang pagpapalit ni Brig. Donald Gumiran kay Lt. Gen. Antonio Nafarrete bilang commander ng 6th ID ay isinagawa sa Camp Siongco sa presensya ng hepe ng Philippine Army na si Lt. Gen. Roy Galido.

Itinalaga namang fulltime commander si Nafarrete ng Westmincom sa Zamboanga City.

Si Gumiran ay nagsilbing commanding officer ng 602nd Infantry Brigade ng 6th ID bago siya itinalaga bilang bagong 6th ID commander. 

Inatasan ni Galido si Gumiran na ipagpatuloy ang mga multi-sector peace building projects ni Nafarrete noong siya ang commander ng 6th ID at suportahan ang security programs ng Commission on Elections na naglalayong maging mapayapa at malinis ang May 2025 elections sa Central ­Mindanao.