Convenience store, pinasok ng solong holdaper

CAVITE, Philippines —  Isa na namang convenience store ang pinasok at pinagnakawan ng nag-iisang armadong lalaki at natangay ang perang kinita at cellphone ng kahera, kamakalawa sa Brgy. Kaybagal Central, Tagaytay City.

Sa salaysay ng cashier na si alyas “Jimma” sa pulisya, alas-2:45 ng madaling araw nang habang siya ay naka-duty sa loob ng nasabing store nang pumasok umano ang suspek at nagpanggap na kustomer.

Nagpaikot-ikot pa umano ang suspek sa loob ng store at nang makatiyempo ay nilapitan ang naturang kahera saka tinutukan ng maiksing baril at nagdeklara ng holdup.

Mabilis na kinulimbat ng suspek ang hindi bababa sa P20,000 na laman ng kaha at ang cellphone ng biktima na Galaxy A5, bago sumibat sakay ng dark gray na Mio Gear motorcycle.