MPOX nakapasok na sa Baguio City, health officials inalerto ni Magalong

BAGUIO CITY, Philippines —  Inalerto ni Baguio City Mayor Benjamin Magalong ang publiko, matapos na kumpirmahin nitong Sabado ng mga public health officials ang nagtala sila ng kauna-unahang kaso ng monkeypox (MPOX) sa lungsod.

Inabisuhan ni Magalong ang lahat na iobserba ang mga health precautions at nanawagan sa lahat na manatiling kalmado dahil wala namang dahilan para sa panic o lockdown.

Pinayuhan ni Magalong, dating contact tracing czar sa COVID-19 pandemic, ang mamamayan sa lungsod na sundin ang mga karaniwang health protocols tulad ng pagsusuot ng face masks at iobserba ang physical distancing, hand and personal hygiene, at tamang bentilasyon.

Sinabi naman ng Baguio City Health Services Office na pinamumunuan ni City Health Officer Dr. Celia Flor Brillantes, ang unang kaso ng MPOX sa lungsod ay mula sa isang 28-anyos na lalaki.  Ang impeksyon nito ay dulot ng less severe Clade II MPOX virus type at hindi Clade I na kinokonsiderang “deadly” o nakamamatay.

Ang MPOX ay isang viral disease na ang karaniwang sintomas o senyales ay mga rashes o blisters sa katawan.

Ayon sa health officials, nakumpleto na ang isolation sa nasabing pasyente at nagamot noong Enero 17, 2025.

Ang MPOX virus, ayon sa Health Department ay nakahahawa. Ang “human-to-human” transmission ay sanhi ng direct contact na may “skin o mucosal lesions”. Naipapasa ito sa pagsasalita at paghinga, paghalik, paghawak, pagyakap, o sexual intercourse at sa pamamagitan din ng “respiratory secretions”.

Maaari rin umanong makuha (indirectly) ang virus mula sa kontaminadong bedding, clothing o linens at iba pang kagamitan.