Titser, anak patay sa nag-counterflow na minivan

COTABATO CITY, Philippines — Kapwa nasawi ang isang motoristang guro at ­angkas niyang menor-de-edad na anak nang salpukin sila ng minivan na lumihis sa tamang lugar at nag-counterflow sa isang bahagi ng highway sa poblacion ng Mlang, Cotabato nitong Lunes.

Sa ulat ng Mlang Municipal Police Station, unang namatay ang anak na si Sean Andrew Damcel, 13-anyos, estudyante ng Mlang National High School, habang sa pagamutan na nalagutan ng hini­nga ang kanyang inang public school teacher na si Jenelyn, kapwa residente ng Barangay Inas sa naturang bayan.

Ayon sa mga saksi at mga imbestigador ng Mlang Municipal Police Station, biglang nag-counterflow ang minivan na galing sa kabilang direksyon ng highway kaya nito nasapol ang kasalubong na motorsiklong sinasakyan ng nasawing mag-ina.
Nasa kustodiya na ng lokal na pulisya ang driver ng minivan na sangkot sa aksidente.