Magkaibigan papuntang birthday party pinagsasaksak: 1 todas

CAVITE, Philippines — Patay ang 29-anyos na lalaki habang sugatan ang kaibigan nito makaraang pagsasaksakin ng dalawang suspek habang naglalakad papunta sa isang birthday party kamakalawa ng hapon sa Brgy. Victoria Reyes, Dasmariñas City.

Kinilala ng pulisya ang nasawi na si Frederick Encabo, na nagtamo ng limang saksak sa iba’t ibang parte ng katawan, habang inoobserbahan sa pagamutan ang kaibigan nito na si Melvin Gracila, 30; kapwa residente ng Brgy. Victoria Reyes, Dasmariñas City, Cavite. 

Pinaghahanap naman ng awtoridad ang tumakas na suspek na si alyas Roel, at isa pang kasama.

Sa imbestigasyon ng pulisya, alas-2 ng hapon nang maganap ang insidente, magkasabay na naglalakad ang mga biktima patungo sa birthday party ng kanilang kaibigan sa nasabi ring lugar nang salubungin sila ng mga nakaabang na suspek.

Agad na naglabas ng patalim ang dalawang suspek at sinugod ang mga biktima saka pinagtulu­ngang undayan ng sunud-sunod na saksak saka sila mabilis na tumakas.

Agad naitakbo sa pagamutan ang mga biktima subalit idineklarang patay na ang isa na tadtad ng saksak sa katawan.