Binata na umiinom ng softdrinks pinagbabaril ng tandem, utas
CANDELARIA, Quezon, Philippines — Pinagbabaril hanggang sa mamatay ang isang binata ng motorcycle riding-in-tandem habang ang biktima ay umiinom ng softdrinks sa gilid ng tindahan sa Candelaria-San Juan road na sakop ng Barangay Malabanan Sur, sa bayang ito, kamakalawa ng gabi.
Ang biktima na nagtamo ng mga tama ng bala ng kalibre 45 sa ulo at iba’t ibang parte ng katawan ay kinilalang si Daniel Castillo, 30 , binata at residente sa naturang lugar.
Ayon kay PLt. Col. Alexis Oliver Nava, chief of police dito, bandang alas-7:45 ng gabi ay nakatayo lamang sa gilid ng RM store ang biktima matapos na ito ay bumili ng softdrinks nang lapitan ng dalawang hindi nakikilalang lalaki at walang sabi sabing pinagbabaril gamit ang kalibre 45.
Nang matiyak na patay na ang biktima ay mabilis na sumakay sa isang motorsiklo ang mga salarin saka tumakas patungo sa direksyon ng bypass road.
Inatasan na ni Lt. Col. Nava ang kanyang mga operatiba upang tugisin ang mga suspek kasabay ng pagtukoy sa motibo sa krimen.
- Latest
