Higit 2K taga- Cagayan de Oro City, nakinabang sa 16th NHA People’s Caravan

MANILA, Philippines — Nakinabang ang may mahigit 2,000 benepisyaryo mula sa iba’t ibang resettlement sites sa isinagawang ika-16 na Peoples Caravan ng National Housing Authority (NHA) “Serbisyong Dala ay Pag-asa” sa Phase 1 Covered Court, Mambuaya Village, Cagayan de Oro City, Misamis Oriental.

Ayon kay NHA General Manager Joeben Tai, ang proyekto ay layong ilapit ang iba’t ibang programa at serbisyo ng pamahalaan sa mga benepisyaryo at kanilang pamilya mula sa mga kalapit na komunidad.

Ang caravan na pina­ngunahan nina NHA Assistant General Manager Alvin  Feliciano, Cagayan de Oro/Misamis Oriental/Camiguin District Office OIC Ar. Maria Madelyn Madrid ay nilahukan ng mga serbisyong dala ng 21 partnered agencies ng pamahalaan.

Ang Department of Health (DOH) ay nag-alok ng libreng medical/dental mission, gamot, at chest X-ray; habang pinalawig ng Philippine National Police at Armed Forces of the Philippines-4th Infantry Division ang seguridad, emergency standby at rescue services.

Dinagsa rin ang job fair na handog ng Public Employment Service Office (PESO)-Department of Labor and Employment habang pinangasiwaan naman ng Department of Migrant Workers at ng Overseas Workers Welfare Administration ang isang orientation/seminar sa mga programa at serbisyo para sa Overseas Filipino Workers, kamalayan sa pananalapi, at pagsasanay sa pamamahala ng maliliit na negosyo.

Nagdala rin ang caravan ng iba’t ibang livelihood programs, food safety, skills enhancement at entrepreneurship trainings, business and capital consultancy, scholarship programs mula sa TESDA, DTI, DSWD, at DOST.

Nabigyan naman ng pagkakataon ang mga benepisyaryo na mag-apply para sa National ID at iba pang serbisyo sa civil registry tulad ng pagproseso ng Birth Certificate, Death Certificate, Certificate of No Marriage Record, Marriage Certificate sa Philippine Statistics Authority; membership registration at Loyalty Card issuance ng Pag-IBIG Fund; membership at PhilHealth ID; membership registration at pension concerns ng SSS; police at NBI clearances sa; pagpaparehistro ng mga botante ng Comelec; gayundin ang aplikasyon at pag-renew ng LTO driver’s license.

Ang mga abot-kayang farm-to-market na produkto at bigas ay ibinenta sa kaganapan sa pamamagitan ng Department of Agriculture (DA) Kadiwa on Wheels. Namigay din sila ng mga libreng binhi, fertilizers, at IEC materials, at nagsagawa din ng oryentasyon sa tulong pinansyal mula sa pagbabayad ng financial loan ng DA.

Ang Department of Information and Communications Technology (DICT) ay nagbigay ng libreng onsite internet at wi-fi at isang oryentasyon ng eGOv Super App. Ang Public Attorney’s Office (PAO) ay nagsagawa rin ng libreng legal na konsultasyon at mga serbisyong notaryo.