Magkapatid na Nograles hahamunin ang mga Duterte sa Davao City

MANILA, Philippines — Naghain na ng Certificate of Candidacy (COC) nitong Martes ang magkapatid na sina Puwersa ng Bayaning Atleta (PBA) Party-list Rep. Margarita “Migs” Nograles at Karlo Alexei Nograles kaugnay ng gaganaping mid-term election sa Mayo 2025.

Si Rep. Migs ay nag­hain ng COC sa tanggapan ng Comelec sa Magsaysay Park kaugnay ng pagtakbo sa Davao City 1st District na makakalaban ni reelectionist Rep. Paolo “Pulong” Duterte.

Samantala, ang kapatid ni Rep. Misg na si Karlo Alexei ay naghain ng COC na kakalabanin naman ang dati niyang boss na si dating Pangulong Rodrigo “ Digong” Duterte sa mayoralty race ng Davao City.

Bago ito, nagbitiw si Karlo Alexei bilang Civil Service Commission (CSC) chairman upang ipursige ang kaniyang kandidatura sa pagtakbong alkalde ng lungsod ng Davao.

“The people of Davao have the right to choose, the right choice, at this right time in our beloved city’s history,” saad ni Karlo Alexei.

Si Karlo Alexei ay nagsilbing Cabinet Secretary sa ilalim ng administrasyon ni dating Pangulong Rodrigo Duterte.

Ang magkapatid na naghain ng kanilang COC nitong Martes ng umaga ay anak ni dating Speaker Prospero “Boy” Nograles.