63 NPA terrorists sumuko sa Eastern Mindanao
MANILA, Philippines — Umani ng tagumpay ang counter-insurgency campaign ng tropa ng pamahalaan kasunod naman ng pagsurender ng umaabot na sa 63 New People’s Army (NPA) terrorists sa bahagi ng Eastern Mindanao, ayon sa ulat ng isang opisyal nitong Lunes.
Sa report na tinanggap ni Lt. Gen. Luis Rex Bergante, commander ng AFP-Eastmincom, ang nasabing mga rebelde ay sumurender sa loob ng isang linggo sa buwang kasalukuyan .
Ang 4th Infantry Division (ID) ng Philippine Army na nasa ilalim ng command ni Bergante ang nangasiwa sa pagsurender ng 16 rebeldeng NPA na may bitbit na 12 armas at isang anti-personnel mine habang sa 10th ID ng Army naman nagmula ang 49 nagsisukong mga rebelde na may pito namang armas.
Sinabi ng opisyal na ang mga rebelde, sumurender matapos na mapagtantong mali ang ideolohiyang kanilangxc ipinaglalaban. Pagod na rin umano sila sa walang humpay na pagtugis ng tropa ng mga sundalo laban sa hanay ng mga lokal na teroristang NPA na sangkot sa paghahasik ng sindak lalo na sa kanayunan.
Kaugnay nito, nanawagan si Bergante sa nalalabi pang mga rebeldeng NPA na magsibaba na sa kabundukan at sumuko nang mapayapa sa pamahalaan.
- Latest
