LUCENA CITY, Philippines — Patay na ng matagpuan sa garahe ng pag-aari niyang hardware ang isang 63-anyos na lalaking negosyante makaraang tuluyan ng mga hindi nakikilalang magnanakaw na nanloob sa tahanan at hardware nito kamakalawa ng umaga sa Barangay Dalahican ng lungsod na ito.
Kinilala ng pulisya ang biktima na si Elmer Maracas, may-asawa at residente sa nasabing lugar.
Batay sa ulat ni PLt. Col. Dennis De Guzman, chief of police rito, bandang alas-5:00 ng umaga ay nadiskubre ng anak na babae ng biktima na napasok ng mga magnanakaw ang kanilang bahay at hardware na Dalahican Construction Supply and General Merchandise at nawawala na ang kanilang hindi natukoy na halaga ng collection sa nakalipas na mga araw.
Nang hanapin sa kanyang kuwarto ang kanilang padre de pamilya ay hindi makita kung kaya’t agad silang humingi ng tulong sa pulisya.
Sa pagsisiyasat at paghahalughog ng awtoridad sa lugar, natagpuan ang katawan biktima sa garahe na wala nang buhay. May mga galos at pasa ito sa tuhod at may katabing nylon cord.
Patuloy ang isinasagawang imbestigasyon ng pulisya upang matukoy ang dahilan ng pagkamatay ng biktima at para makilala ang mga salarin sa pamamagitan ng CCTV camera.