Higit 100 empleyado ng SP-Urdaneta City, ‘di sumahod
Dahil sa 90-day suspension ng mayor
BAGUIO CITY, Philippines — Mahigit 100 na kawani ng Sangguniang Panlungsod (SP) ng Urdaneta City sa Pangasinan ang hindi sumahod dulot diumano ng 90-day preventive suspension ni Mayor Julio Parayno lll, na ibinaba ni Governor Ramon V. Guico III.
Hindi rin umano pinirmahan ni Acting City Mayor Jimmy Parayno ang sahod ng mga empleyado dahil si Acting Vice Mayor Franco Del Prado ang nararapat na pumirma ng payroll.
Habang hindi naman diumano makagalaw si acting VM Del Prado dahil wala pa siyang designation order mula sa Department of Interior and Local Government (DILG).
Sa panayam kay Urdaneta City DILG Officer Richard Real, nai-email na umano ni DILG-Ilocos Region Regional Director Jonathan Paul Leusen sa tanggapn ni DILG Secretary Benhur Abalos ang naturang order para mapirmahan na ito ng kalihim.
Gayunman, ‘di pa napipirmahan ni Abalos ang designation order ni Del Prado dahil abala umano ang Kalihim sa paghahanda ng kanilang taunang budget para sa 2025.
Magugunita na inilabas ng Blue Ribbon Committee ng Sangguniang Panlalawigan at ibinaba ni Gov. Guico ang preventive suspension ni Parayno noong Agosto 12, 2024 dahil sa reklamong hindi makatarungang pagbibinbin sa aplikasyon ng isang poultry firm sa Brgy. Tiposu, Urdaneta City noon pang 2020.
Humirit naman si Parayno III ng Temporary Restraining Order (TRO) sa korte sa kanyang suspension order.
Naganap noong Agosto 21, 2024 sa sala ni Judge Crisma V. Nabua ng RTC Branch 73 ang hearing ng TRO, Writ of Preliminary Injunction and/or Status Quo Ante-Order” na petisyon ni Parayno.
Naghain din ang sinuspindeng si Parayno III ng Civil Case laban kina Gov. Guico III, Vice Gov. Mark Ronald DG Lambino, Board Members Shiela Marie Baniqued, Napoleon Fontelera, Noel Bince, Apolonia Bacay, Philip Theodore Cruz, Haide Pacheco, Vici Ventanilla, Marinor De Guzman, Jerry Agerico Rosario, Rosary Gracia Tababa, Nichole Jan Louie Sison, Carolyn Sison, Joyce Fernandez, Raul Sabangan, Atty. Verna Nava-Perez at sa Anti-Red Tape Authority (ARTA), na una nang nagrekomenda sa pagpapa-suspinde kay Parayno dahil sa nasabing usapin.
- Latest
