Trike driver niratrat ng pasahero, patay!

MANILA, Philippines — Patay ang isang tricycle driver makaraang pagbabarilin ng kanyang isinakay na pasahero kamakalawa sa Purple Drive Corner Hue Drive, Pacita Homes, Brgy. San Francisco, Biñan City.

Kinilala ng pulisya ang biktima na si Mark Anuran, nasa hustong gulang, residente ng Biñan City, Laguna habang inaalam pa ang pagkakakilanlan ng salarin na mabilis tumakas tangay ang armas na ginamit sa krimen.

Lumalabas sa imbestigasyon na alas-9:00 ng umaga nang maganap ang pamamaril. Sumakay umano ang suspek sa tricycle ng biktima at habang bumabagtas na sa kahabaan ng Purple Drive, Pacita Homes ng nasabing barangay ay dito na siya pinagbabaril ng una.

Idineklarang dead-on-the-spot ang biktima dahil sa mga tama ng bala ng di pa batid na kalibre ng baril sa kanyang ulo at katawan.

Nagsasagawa pa ng follow-up investigation at operation ang Biñan City Police upang matukoy at madakip ang suspek, at malaman ang motibo sa pamamaslang.