3 babae dedo, 5 malubha sa road mishap
COTABATO CITY, Philippines — Tatlong babaeng motorista ang agad na nasawi habang limang iba pa ang naisugod sa mga pagamutan sanhi ng aksidente sa Koronadal-General Santos Highway sa Barangay Saravia sa Koronadal City nitong gabi ng Martes.
Sa ulat nitong Miyerkules ng Police Regional Office-12, agad na binawian ng buhay sina Rogela Bayang, 24-anyos; Vivian Hilaria 18-anyos, at ang 21-anyos niyang kapatid na si Rhealyn Hilaria nang masapol sila habang sakay ng dalawang motorsiklo ng isang puting Mitsubishi Strada pickup truck sa isang bahagi ng highway sa Purok Ilang-Ilang sa Koronadal City.
Sa salaysay ng mga saksi, patungo sa sentro ng Koronadal City ang pickup truck ng Bureau of Fisheries and Aquatic Resources 12 ng nag-overtake ng isang tricycle at, ng magawi sa kabilang linya ng highway, ay nasapol ang dalawang kasalubong na mga motorsiklong sakay ang tatlong mga biktima.
Limang kasama ng 34-anyos na pickup truck driver na si Pelong Dangkalan, na sina James Enrijo, 38-anyos, Ryan Tapon, 22-anyos, Roderick Tapon, 48-anyos, Kenneth Fronda, 24-anyos, at Reynan Lara, 40-anyos, ang nagtamo ng mga sugat at pasa sa katawan sanhi ng aksidente.
Nasa kustodiya na ng Koronadal CPO si Dangkalan.
- Latest
