Trike driver patay sa pamamaril
MANILA, Philippines — Patay ang isang tricycle driver nang pagbabarilin ng hindi pa kilalang salarin sa Tanay, Rizal, kamakalawa ng gabi.
Ang biktima ay kinilalang si Joel Magdaong, 46, residente ng Liro Homes, Sitio Malapapaya, Brgy. Sampaloc, Tanay.
Nakatakas naman ang suspek na inaalam pa ng mga otoridad ang pagkakakilanlan.
Batay sa ulat ng Tanay Municipal Police Station, alas-7:00 ng gabi nang maganap ang krimen sa Liro Homes, Sitio Malapapaya, Brgy. Sampaloc, sa Tanay.
Sa salaysay ng saksi, nabatid na kasalukuyan umano siyang nasa loob ng kanilang bahay nang makarinig ng tatlong sunud-sunod na putok ng baril. Nang alamin ang pinagmulan ng putok, dito na umano niya nakita ang biktima na nakahandusay sa daanan.
Kaagad nilang ipinaalam ang insidente sa mga pulis upang maimbestigahan.
- Latest
