Misis, 10 beses sinaksak ni mister sa selos!
MANILA, Philippines — Patay ang isang ginang matapos na tadtarin ng saksak ng kanyang kinakasama sa gitna ng kanilang pagtatalo dahil sa sobrang selos sa loob ng kanilang tahanan sa Binangonan, Rizal kamakalawa ng gabi.
Hindi na umabot nang buhay sa pagamutan ang biktima na kinilala sa alyas na “Elsa”, nasa hustong gulang at residente ng nasabing bayan bunsod ng tinamong hindi bababa sa 10 saksak sa iba’t ibang bahagi ng kanyang katawan.
Tumakas naman ang suspek na kinilala sa alyas na “Fernando”, live-in partner ng biktima.
Sa imbestigasyon ng pulisya, alas-11:45 ng gabi nang maganap ang insidente sa bahay ng mag-live in partner.
Nagtatalo umano ang mag-partner hinggil sa pagseselos ng suspek hanggang sa maburyong ang huli at kinuha nito ang kanyang balisong at inundayan ng sunud-sunod na saksak ang biktima.
Tinutugis na ng pulisya ang suspek na nahaharap sa kasong murder.
- Latest
