Paslit nalunod sa swimming pool

MANILA, Philippines — Patay ang isang paslit nang malunod habang naliligo sa swimming pool ng isang resort sa Rizal,kamakalawa.

Wala ng malay at nakalublob sa tubig ang biktimang si alyas ‘Boy,’ 6, at residente ng Rodriguez, Rizal nang ma­diskubre.

Lumilitaw sa inisyal na pagsisiyasat ng Rodriguez Municipal Police Station na dakong alas-10:00 ng umaga nang maganap ang insidente sa loob ng isang resort sa Sitio Gulod, Brgy. San Isidro, Rodriguez.

Bago ang insidente ay nagkayayaan umano ang pamilya ng biktima na mag-swimming sa naturang resort.

Noong una umano ay magkasama ang paslit at ang kanyang ina habang naliligo sa pool.

 Gayunman, naisipan ng ginang na magtu­ngo sa kanilang cottage upang kumuha ng pagkain at iniwan ang anak sa mababaw na bahagi ng swimming pool.

Laking gulat naman ng ginang nang sa kanyang pagbalik ay nawawala na ang kanyang anak.

Kaagad umano siyang humingi ng tulong upang hanapin ang bata ngunit nakalublob na ito sa malalim na bahagi ng pool nang kanilang matagpuan.

Mabilis nilang iniahon ang biktima at isinugod sa pagamutan ngunit idineklara na ring patay ng mga doktor.