Motor salpok sa kotse: Rider dedo, 12-anyos sugatan

NAGA CITY, Camarines Sur, Philippines — Dead-on-arrival sa pagamutan ang isang 19-anyos na rider habang malubhang nasugatan ang kanyang 12-anyos na kapatid na angkas matapos malakas silang bumangga sa kotse sa kahabaan ng Maharlika National Highway ng Brgy.  Del Rosario, Naga City, Camarines Sur kamakalawa ng hapon.

Matinding sugat sa iba’t ibang bahagi ng katawan ang agarang ikinasawi ng biktimang si Mark John Santos Estrada, residente ng Zone-2, Brgy. Palestina, Pili.

Sugatan at patuloy na nagpapagaling ang minor na kapatid na kinilala lamang sa pangalang Erika.

Sa ulat, dakong alas-3:37 ng hapon, binabagtas ng Mitsukoshi Euro motorcycle (372-QMR) na minamaneho ni Estrada ang kahabaan ng highway at angkas ang kanyang nakababatang kapatid nang mawalan ng control sa manibela at bumangga sa kasalubong na Hyundai Accent na kotse na minamaneho ni Jaime Nava­rro Patani, 67-anyos, residente ng Poblacion l, Del Gallego.

Sa lakas ng pagkakabangga, parehong nawasak ang motorsiklo at ang kaliwang bahagi ng kotse habang kapwa tumilapon at bumagsak sa sementadong kalsada ang mga biktima.

Mabilis silang nires­pondehan ng mga pulis at Naga City Rescue Ambulance at isinugod sa Bicol Medical Center ang rider pero hindi na umabot nang buhay.