Motor salpok sa gusali: Rider patay, angkas kritikal

CAVITE, Philippines — Patay ang isang rider habang kritikal ang backrider nito makaraang sumalpok sa pader ng isang gusali ang sinasakyan nilang motorsiklo kahapon ng madaling araw sa Barangay Daang Amaya 3, Tanza, lalawigang ito.

Dead-on-arrival sa pagamutan ang biktimang si alias “Jordan”, 20, ng Tanza-Trece Road, Brgy. Bagtas, habang inoobserbahan sa pagamutan ang angkas nitong si alias “Jerwin”, 25-anyos ng Brgy. Punta 2, Tanza, Cavite.

Sa imbestigasyon ng pulisya , alas-2:30 ng madaling araw habang bumabagtas ang mga biktima sa nasabing highway sakay ng  Yamaha Mio sporty (118DAN) ng dire-diretso itong sumalpok sa pader ng CDC building.

Sa lakas ng pagkakasalpok, nawasak ang motorsiklo at tumilapon ang mga biktima na kapwa tumama ang kanilang ulo sa kalsada.

Agad na naitakbo sa Tanza Specialist Medical Center ang dalawa subalit idineklarang patay si Jordan.