Mister inutas ng ‘lover’ ng ka-live in!

Nahuling magkasiping sa bahay

SORSOGON CITY, Sorsogon, Philippines — Bulagta ang isang 50-anyos na mister matapos pagbabarilin ng “kalaguyo” ng kanyang live-in partner makaraan niyang mahuli ang dalawa sa aktong magkasiping sa loob mismo ng kanilang tahanan sa Brgy. Tugos West District, Sorsogon City, Sorsogon, kamakalawa ng madaling araw.

Napuruhan ng punglo sa kanang bahagi ng dibdib at iba pang bahagi ng katawan ang biktima na kinilalang si Donden Malben, residente ng naturang lugar sanhi ng kanyang agarang kamatayan.

Tinutugis na ng mga pulis ang hindi pa pina­ngalanang suspek na mabilis na tumakas makaraan ang pamamaril.

Sa ulat, dakong alas-2:30 ng madaling araw, umuwi si Malben sa kanilang bahay.

Gayunman, laking gulat nito nang pagpasok siya ay tumambad ang kanyang kinakasama at suspek na parehong hubad at magkasiping sa loob ng kanilang bahay.

Dahil dito, nagkaroon ng mainit na pagtatalo hanggang sa magsuntukan ang biktima at suspek sa labas ng bahay.

Sa gitna nang banga­yan ng dalawa,  kinuha ng biktima ang kanyang kalibre 45 baril sa dalang bag, pero mabilis na naagaw ito ng suspek at ilang beses niyang pinutukan ang biktima hanggang sa duguang bumulagta.

Narekober ng mga rumespondeng pulis sa lugar ng insidente ang apat na basyo ng bala ng Kalibre 45 baril.