Sanggol na kinidnap sa ospital, nasagip
MANILA, Philippines — Nasagip na ng mga operatiba ng pulisya nitong Biyernes ang isang 3-buwang sanggol matapos nakawin sa kaniyang ina sa isang hospital sa Davao City.
Sa ulat ng Police Regional Office (PRO) 11, kinilala ang nasakoteng suspect na si Rhialyn Herrera, 36-anyos, tubong Zamboanga City at residente ng Brgy. Mintal, Tugbok District ng lungsod.
Ang pagdukot sa sanggol ay ini-report sa pulisya ng 26-taong gulang nitong ina na nangyari sa Southern Philippines Medical Center sa Davao City noong Agosto 12, 2023.
Ayon kay P/Captain Hazel Tuazon, spokesperson ng Davao City Police Office, matapos na makatanggap ng impormasyon sa kinaroroonan ng suspect ay agad silang nagsagawa ng rescue operation upang mabawi ang sanggol.
Matagumpay na nailgtas ng raiding team ang sanggol habang naaresto ang dumukot dito. Dinala na sa Holy Spirit Hospital ang sanggol at isinailalim sa checkup at nasa mabuti namang kondisyon.
Sa imbestigasyon, habang nagpa-pump ng gatas ang ina sa kaniyang suso ay nag-alok ang suspek na kakargahin nito ang beybi, pero bigla na lamang umanong nawala at tangay na ang sanggol.
- Latest
