Big-time ‘pusher’ timbog sa P14.3 milyong shabu
MANILA, Philippines — Umiskor ang mga operatiba ng pulisya matapos nilang maaresto ang isang big-time pusher na miyembro ng kilabot ng drug group at makumpiskahan ng may P14.3-milyong halaga ng shabu sa isinagawang anti-drug operation sa Bacolod City, Negros Occidental, ayon sa Philippine National Police (PNP) nitong Sabado.
Agad pinuri ni PNP chief General Benjamin Acorda Jr. ang mga tauhan ng Bacolod City Police Office (BCPO) at City Drug Enforcement Unit (CDEU), dahil sa pagkakadakip sa suspect na si Michael Frias alyas “Tata” at “Toto Gonzales”, 45-anyos, at kasapi ng “Caunda Drug Group”.
Nakumpiska kay Frias ang tinatayang nasa 2.115 kilong shabu na may halagang P14.382 milyon.
Base sa ulat ng BCPO, isang buy-bust operation ang ikinasa ng CDEU laban kay Frias dakong alas-6:49 ng umaga kamakalawa sa Purok Pablo Torre, Brgy Vista Alegre, Bacolod City sanhi upang siya ay maaresto nang makuhanan ng malaking bulto ng shabu.
Ayon kay BCPO director Police Col. Noel Alino, si Frias ay kanang kamay ng lider ng Caunda Drug Group na si Maria Caunda na tubong Mindanao. Nasa P100,000 reward na ang alok ng awtoridad para sa ikadarakip ng naturang babaeng lider ng grupo.
- Latest
